Kawlgam ah 1948 kum suahtakna ngah khit akipan Khamtungmi Universities sangnaupang kipawlna a khang a khang in na om toto  hi. 1948-1962 sungteng khamtungmi Siamsin Kipawlna, Hill Chin Student Union min tawh Rangoon University ah  kipawlna om hi. Zosuan Siamsinte kipawlkhawm in minam khantohna ding  kikumkhawm thei a, minamdangte lakah khat le khat kikhualna bekthamlo ngeinate kemcing in University huam ah unau sanggam khat mah bangin na kithuah uh hi. Tua kithuahnate  University kahsung bekhilo, sangman khit ciang nasep tuamtuam ah a lut  uh hang, ki-itna kiamlo, gam le  minam ading  kisapnate ah Siamsin hunlai ki-itna te mah bulphuh in ma na pang khawm thei uh hi.

1961 kum in Shan gam khuapi Taungyi ah kibawl Mualtungmiteng Kimuhkhopna Pawipi ah tua hun lai-in Hill Chin Student Union pan President ahi Mr Chin Sian Thang (Law Major) in Siamsinte palai-in nakihel a,1948 Kawlgam Thukhunpi puahphatna ding tawh  kisai-in Zomite tangin thu nasung thei hi. Hih thupen Siamsin tangthu ah gamvai tawh kisai a kimuthei Siamsinte thuneihna atawpna  hong hita hi.

1962 khit General Naywin makai in galkapte in Kawlgam kumpi hong sep akipan kipawlna tuamtuamte hong kiphiat in Socialist upna tawh ki-kalsuan hi. Siamsin kipawlnate zong  Union kici nawnlo a, Chin Literature and Culture Committee cih min tawh kilaih ahimanin sangnaupangte thuneihna tampi hong kiam in Minam khantohna ding thute pan  ngeina le laivai kibatlohna thu tawh Zosuan Siamsinte sungah thu kituahlohna hong tam tetek hi.

1964-65 kum kim ciangin Rangoon ah  University sangkah Siamsinte in Zomi Siamsin Tang Sum cihtawh fund paulap in kipawlna khat na nei uh hi. Tua munpan Tedim kampau Zomite kipawlna dingin Zomi Siamsin Kipawlna ci-in hong kho tektek  hi. Tua hun lai-in Yangon, Mandalay cihbek phial ah University om ahimanin  khamtung khua tek pan University kah a kihihna le Zomi Saimsin Kipawlna sungah kihelnate tawh  Zosuante  khat le khat kithei in gam le minam khantoh nadingte ah na kithuah thei uh hi.

1988 khit SLORC leh 1997 SPDC galkapte gam uk hun akipan Kawlgam mun tuamtuam  akigawm 115 phial ah University le College hong hong thak uh ahimanin Zosuan Siamsinte zong kikhenthangin sanggam unau laizom takpi nangawn kitheihna hong om nawnlo hi. Tua banah nidanglai danin khamtung ah kitengcip zo nawnlo a,  lo no na lam manawhin Zosuante  kikhenthangna hang' khua khat tui khat hihna le sangkah khopnate pan hong piang khia ki-itnate Zosuan khangthakte sungah hong om nawnlo hi. Gam le minam khantohna ding asem abawl khawm ding teng sungah kimeltheihna, ki-itna hong bei thei zah dong dingin patauhhuai dinmun ah kitung ta hi. 2004 kum in gamdang pan huhna tawh Chin Literature and Culture Committee omna ahi Yangon, Madalay, Magwe,Monywa, Pakoku, Kalay pan Siamsin makaite Yangon ah  kituah in CLCC Central, Myanmar hong phuan khia uh hi. 1962 khit khua tuamtuam panin mun tuamtuam ah sangkah in a kikhenthang Zosuante kikaihkhopkikna masa pen hong hita hi.

2005 kum ciangin CLCC, Central Myanmar min tawh Hakha khuapi ah akhatveina Develpoment Seminar kibawl hi. Tuamunah Seminar kahin apaite sungpan Tedim kampau Zomi Siamsin makaite pen  amau sangkahna CLCC sung tek pan makai dinmun tawh hong kihelthei uh hi. CLCC-Yangon pan Dr Pau Sian Lian, CLCC-Mandalay pan Tg Ignatius Thang Sut Mung, CLCC-Magwe pan Dr Nung Mun Thawn, CLCC-Monywa pan Tg Yin Sian Mung, CLCC-Kalay panTg Michael Suan Lian Pau cih bangin Tedim kampau Zomi Siamsin makaite kituahkhopna pan Kawlgambup Zomi Siamsin Kipawlna phuatkhiat ding vision hong nei uh hi.Tua Hakha Seminar pan hong piang vision pen 2006 November 20-23 sungin Tedim Khuapi Khaudo Hall ah amasa pen Kawlgambup Zomi Siamsin Seminar mitmuhin hong piang khia hi. Kawlgam sungpan mun tuamtuam ahi Zangkong, Mandalay, Monywa, Kawlpi, Magwe khuapite a om Zomi Siamsin makaite hanciamna tawh kipankhia in hong lawhcing mahmah hi. Hih pawipi pan Kawlgambup Siamsin  Kipawlna kipsak ding hoih kisa a, Zomi Siamsin Kipawlna, Universities- Myanmar (ZSK-UM) cih ding kithukim hi. Kipawlna ah panmunlen ding kitel a, Gambup Siamsin EC kinei hi. Hih pan in Seminar II Kawlpi ah neihkik dingin kithukim hi. Siamsinte Motto dingin zong India gam a om sanggam Siamsin Pawlpite tawh athu kihualthei dingin “Sinin, Semin, Mainawt ni” cih ding kilungkim hi.

2007 kum sung  hamsatna tuamtuam le gambuaina hangin tua kum Seminar piang zolo hi. Siamsin makai  Central EC teng zong Salfron Revolution ah kihel  uh ahimanin hong kikhen thang uh hi. Malaysia a tungkhin sa  Pawllutang kiangpan 2008 August kha ciangin gamsung ah a om lai Siamsinte tungah panmun le thuneihna  hong ap thei pan hi.
2008 kum ciang, gambup thuzekpi ( tualaitak) tungpan phalna tawh Kawlpi Siamsinte in vaipuak la in Seminar II bawlkik ding kigeel phakik hi. Mun tuamtuam a om Siamsinte kimutuahin 2008 November 25-30 sung Kalay Baptist Church biakinn ah kinei hi. Tua mun pan Zomi Siamsin Kipawlna, Universities-Myanmar panmun len thak kitel a, tulaitakciang Central EC in hong dingsuak uh hi.

Seminar II pen Siamsin motto, “Sinin, Semin, Mainawt ni,” cih thubulphuh in kinei-in kibawl hi. Siamsin Seminar III tawh kisai  2010 kitelna tawh a kizomthei thulu hih ding EC meeting masa ah kikupna a om bangin, siapite hong piak ngaihsutna tawh "Post 2010" cih bulphuh ding in hoih kisa hi.  Thulu nono ding thum kiguang a, Post 2010: Political Awareness for Zogam, Post 2010 : Sustainable Development Planning for Zogam, Post 2010: Social and Culture Advancement among Zogam cihte hi-in, khuahun zui-in a theih huai khat mah ahi Development Programme of UN for Zogam cih thulute tawh kikup dingin kingaihsun hi.
Tua hi-in hong tung ding November 24-29 sung Tedim khuapi ah Siamsin Seminar III nasiatak nei-in a tunga, thute a kikupsawm ihi hi.

Siamsin mi 300 kim a kihelthei dingin kilamen a, nek le dawn ah ni khat in mi khat in 1000 Ks tawh a kituat ahi hi. Khanglam pan hong pai khempeuh Kawlpi ah kitung tuah in, Seminar kahna ding mawtaw a kibang in kisap khawm ding hi.Kawlpi pan hi taleh, khanglam mun tuamtuam pan hi taleh Tedim dong a pai nading lamsap amau le amau ahi ding in a kingaihsun ahi hi.

Report
Nikum 2008 Siamsin Seminar II lai-in comitteete manlahna tuamtuam hang in report laibu kha 6 kim khitciang kingahzo pan hi.

Tukum pen report tawh kisai-in Siamsin sung sum zatna le ngahnate nipi nih sungin internet le NulePate tung hawm zawh ding hong kihanciam ding hi.


Seminar sung record, report le thu khensatna tuamtuam khempeuh kha 6 sung in laibu mah tawh kihawm khia kik ding hi.Kawlgam sung ahih leh laibu tawh, tuipi gal a omte internet tawh hong kikhak ding hi.
Benefit
(i)                Siamsin Seminar I
Siamsin Seminar I hangin Siamsin sungah khanlawhna khat hong piang khia hi. Seminar neih a thupi na hong kithak phawk in Seminar neihkik ding lunggulhna nasiatak hong kinei thei hi. Minam tawh kisai thute mimal in lunglut cih hong kilangsak hi. Mi kim in a kipawlthei minam hih ding lunggulhna na a neihna thu zong hong kithei khia hi. Salai le Mai, Lia le Tang cih thu tawh kisai in Siamsinte dinmun ding mikim in kiciantak hong telkhia thei hi. Siamsin Mailing Group kineithei in Siamsin sung thu kizakna hong manlang mahmah hi.
(ii)             Siamsin Seminar II
Siamsin Seminar II bawlna pan Siamsin khempeuh thukimna tawh Siamsin website khat neihkhop ding lungkimna om mahbang in kibawl a, Siamsin mimal gamsung gampua pan kizang khawm hi. Thulela kikupna tampitak hong nuam mahmah pah hi.
Lai lam tawh kisai ngaihsutna thak tampi kineibeh in a kihawm nawnlo lai hawm tuamtuamte hong ki hawm kik pah hi. Internet pan khatlekhat kimeltheihna hong khang semsem hi. Seminar pan zong mun tuamtuam pan in apai Siamsinte thu kizakna hong omden pah hi.
I gam sungah thu lian mahmah ahi 2010 kitelna ah bangcih mainawt ding cih lungngulhna hong kinei thei hi. A kikemcing zolo i tangthu lui tampitakte kan in, i thak suah kik thei hi.
Siamsin in ngeina le lai i zunding i ngaihsutna pan in i Zogam mual le guamte keukhitna tawh kim le pam kephuai ahihna hong thak phawk in kimlepam a kem nasemte tawh khut kilen in nasep theih ding lunggulhna i nei thei hi.
(iii)           Expect Benefit
Zomi sanggam laizom tampite nuntak khuasakna le sum zon paai zonna alemzawkna mun zuanin saklekhang ah kikhenna pan Siamsinte khatlekhat kimu in kimeltheihna ding kilunggulh hi.
Tua banah ei Zomite sungah gamvai tawh kisai in ngaihsut khialhna, muhzia khialhna le kihtakluatna tampi i nei den hi. Hi bang thute hong kiamin malteltak le thu theitakin minam le gamvai i tel theihding a kibulphuh nuam ahi hi. Hong kikhel dingin akigen ki-ukna ah Kumpite hong bangci gamtat ding a, Pinlong thukimna tungtawn in akiphuankhia Kawlgam Belpawlgam ah Zomite ading akihawm, akisehsa  'sa tan' te koici ngahkik ding cih pen sepding le ngaihsutpi ding hong hita hi. Minamdangte lakah bangcih nasep ding, kipawlkhawm thei ding cih i telsiam semsem theihna ding kilamen hi. Gamvai tawh kisai thute ah mihai bang hih nawnloh tuam nang' Seminar in telcianna thak hong pia dingin ki lamen hi.
Gamvai aki gen ciang, pawl khat in lauluat dingin hong ngaihsun leuleu uh hi. Tuabang ahihlohnangin Sitni  pa akipan, thulela thei  mipil, misiam makaite tungpan ngaihsutna lakna tawh hong pai Siamsinte  a ding lauhuaithu bangmah a omlo dingin thuneite phalna tawh kibawl ding hi.

Khantohna tawh kisai-in leitung khantohna tuihual a nungdelh ei Zomite in bangci phakzawh ding cih khatvei a thakin lungngai ding hi hang. Milak salak ah Siamsinte kihel ciang gamtat luhekna ah bangci gamtat ding hiam cih pan kipan ahoih le ahoihlo gamtatnate i khenkhiat siam semsem theihnang zong Siamsin Seminar ngimna khat ahi hi.
I Zogam sungah kim le pam i et ciang a keu singsiang mual le guamte a puahhuai zia athu in i zak banah a mun mahmah vapha in kimu kha thei ding hi. Saklekhang pan Zogam khuapi ngiat ah kikaihkhopna in Zogam zialetongte hong teltuamsak ding hi. A kigen biltawh zakna pan mitmuh hong hita ding hi.
Zogam sungah UNO panlakna mun tam mahmah napin athu le amaute nasepzia bangdan cih zong i theihkhakloh tampi ki thei kha ding hi. I upmawh bang hong hilo NGO nasepna tuamtuamte zong telcian sinsen ding hi hang.
Sanglai ah cikmah hunin a kisin ngeilo ding theihhuai thu tampi Zomiten kinei hi. Sangkah zawh thu le sumlepaai neihna tawh a kingahtheih ding ahilo pilna tuamtuam zong  Seminar bawlna hangin hong ngahsak ding cih zong deihna bulpi khat ahi hi.
Rih tuili paina in Zola sunga i saksak a nim dildial Zogam lei a kicici na munte a nim nawnlohna zong kimukha ding a, Zogam nisuahna mong akici theih khamlezang kimatna pan Tedim gam gunpi le Kawlgam sung a om Zogam a nawlnungpen ahi Ciau luite nawkkha mukha bek hilo in Zogam ah aminthang Rih tuili ciang a kisik kha ding leh Vai gam a om Zosuante gal etto thei ding cih ahi hi.
Seminar hong lawhcin leh Leitung vai bek hilo November nipi tawpna 29 ni in zong Lumdamkoh Nipi Tedim khuapi a om NulePate tawh neikhawm in Zogam khantohna ding thungetna nasiatak kineikhawm ding hi.

Huhngetna
Siamsin mimal kim kihel zawh  ding kilunggulh mahmah ahimanin Kawlgam nuntak haksatna tawh hong ki hel dingte lampan sumlepaai a tawmpen abeitheih na ding, sangkah hunsung hihna tawh sumlepaai haksatnate pen vangikpi a suahloh ding lunggulhna tawh Leitungbup Zomi Innkuan makaite tung ah gamleminam khantohna ding mapang khawmni ci'n zahtakna lianpi tawh huhna kong ngen uh hi.

Tg Michael Suan Lian  Pau, Senior Friend

Zomi Siamsin Kipawlna

Universities-Myanmar

http://siamsin.org

Comments (0)

Name

Comment

smaller | bigger

Write the displayed characters

Add Comment