|
A beisa tawlkhat lai a kipan Zomite sungah thupha ngah minam cih kammal hong laang mahmah hi. “Thupha “ cih kammal pen kammal hoih khat ahih manin, i gennop khat peuhpeuh a sia lua om thei lo hi. Pasian in a bawlsa mihingte khempeuh thupha ngahin a nungta paisuak ding a hong deih a hi hi. Mi khempeuh in thupha mah kideih in, thusia kideih lo hi. Thupha ngah minam i cihte pen Lungdamko siam minamte ahi uh hi.
Laisiangtho sungah mimal thupha, innkuan thupha, minam thupha leh gambup thupha cih bangin kicingtak om hi. Tuate sung pan minam buppi thupha ngahna ding lampi nih om a, (1) Topa pen Pasian a nei minam (2) A ma luah ding a, teel ngah minam te thupha ngah minam (Late.33:12) kici hi. Minam bup khatin thupha ngah theihna dingin Pasian teelna ngah masak kul hi. Leitung ah minam tampi om a, tuate sung pan Israel mite bek mah Pasian teel ahi hi. (Isaiah 42:6, Matt.1:21) Tua hi in Israelte pen Pasian teel tuam ngiat ahih manin, minam dangte tawh kibang thei lo hi. Leitung mun khempeuh ah mipil, misiam leh mihau cihte pen Israelte ahi uh hi. America gam nangawn ah mipil, misiam leh mihau khempeuh pen Israel(Jews)te vive mah ahi hi.
Leitungah biakna khempeuh in lungdamkoh pawi nei ciat uh hi. Pawlkhatte in Anlak pawi (Feast of Thanskgiving Day) ci in nei uh a, a mau ngeina ciat tawh thupitak a bawl zong om hi. Tua mah bangin ei Zomiten zong Zomi ngeina Khuado pawi (or) Anlak pawi lungdamkohna khat mah ahi hi. Zomite hih ciang dinmun i tunna i thuphate en kikkik leng Topa tungah i lungdamkoh ding tampi om ding hi. A beisa kum 5 lai akipan Zomi Christian Alliance (ZCA)te makaihna tawh Zomibup Lungdamkoh Ni (Zomi Thanksgiving Day) i nei thei a, November Nipi nunung kizang den ahih manin lungdam huai kasa mahmah hi. Tukum zong November 26, Nipi nunung tawh kituak ahih manin, mimal, innkuan leh pawlpi ciatah i zatkim ding kisam mahmah hi.
Lungdamkoh Ni hong piankhiatna:
Lai Siangtho sungah lungdamkohna tampi kimu a, a diakdiak in Late sungah, ‘‘lungdamko un !!!! bang hang hiam cih leh Topa hoih in hehpihna tawh kidim…’’ cih vive muntampi ah kimu hi. Hih lungdamkoh Ni (Thanksgiving Day) tawh kisai hong piankhiatna thu i genloh phamawh hi. Leitungah Pasian min suang/paulap a kiphuan gam khat bek om a, tua gamin America ahi hi. Columbus in 1492 kumin America gam na mu khia hi. Ahi zongin America gam taktak hong pian khiatna dingin, tuma kum 400 hun lai 7th Century 1600 kimin England kumpi King James in (The Church of England)upna a zui lote nakpitak bawlsia hi.
Tua bawlsiatna thuak a, atuam om pawl “Separatists” kici Khristian Khualzinte (Pilgrims)in suakta tak Pasian a biak theihna ding ngaihsutna tawh 1607/1608 kumin Holland gamah galtai uh hi. Holland gamah tawmvei a om khin ciangun Pasian um mello leh pau le ham kibang lo lua ahih manin, England gamah ciah kik uh hi. England gam pan America leitang zuan kik dingin May Flower gunkuangpi tawh mi 106 kim hong pai khia uh hi. Atlantic Ocean kantan in haksatna tampi a phut khit uh November 11,1620 kumin America gam Wampanoag Indians kici mivomte tenna tuhun Massachusetts State, Plymounth khua hong tung uh hi. America leitang a tun phet un May Flower Compact ci in kiciamna laikhat hong gelh khia uh a tua lai a patna ah, “ Pasian min tawh Amen( In the name of God, Amen) ci-in gelh uh hi. Khuakhal gamkeu hun laitakin tung uh ahih manin neek le dawn ding haksatna hang leh natna tuamtuam tawh mi106 sung pan 46 si uh hi. A omsa Wampanoag Indians te tawh pau kitellohna leh lokhawh khaicituh zia ding a kipan sin tawmtawm uh a haksa sa uh hi. Nuntakna dingin Ngasa mat zia leh gamsa bet zia te Indians te tung pan limsin mahmah uh hi. A kum kik 1621 kum ciangin Lo pan Vaimim, Mangbuh, Mai gah leh Begap namte kilathei ta hi.
Governnor Mr.William Bradford vaihawmna tawh khua hausa pa Mr. Massasoit (Indians Chief), Mr. Squanto (Translator) leh khua sung makaite mi 90 samin amau lam pan mi 52 tawh a masapen Anlak pawi Topa tungah Lungdamkohna thupitak bawl uh hi. Hih pen America leitang a tun zawh uh a masa pen lungdamkohna hipah hi. Lungdamkohna pawi sungah ah Indiante in Sai Ak hankeu leh gamsa hankeu cihte tawi-in Vaimin tui tawh huan khawmin Pilgrim te tawh pawi an nekhawm uh hi. Tua kum akipan phalbi anlak khit simin Lo ma tung pan thupha apia Topa tungah lungdamkohna nei den uh hi.
England kumpi khut nuaiah (Colony)bawlsiatna kum 100 val thuakin a om khit uh ciangin, England tawh gal hong kido uh hi. Galzawhna dingin a makaipa uh Georg Washington in vuuk lak khuadampi nuai ah khukdin in thungen hi. Galzo in suahtakna a pulak ciang un (1) Pasian pen mihing apiangsak pa ahihna, (Almighty God), (2) Mihingte suahtakna (Human Right) tawh hong piangsak Pasian ahihnate pulak masa uh hi.
Tua banah gam ki ukzia ding Thukhunpi(Constitutions) hong geel uh a, Laisiangtho mah tawh thungen in kipan uh hi. Hih Thukhunpi a bawl ciangin a deihna uh kituak lo ahih manin, a cihna ding thei loin om uh hi. Tua bang laitak in Benjamin Franklin in, “ Pasian dong ni” ci-in a vekpi mahin thungen khawm pah uh hi. Pasian in a thungetna uh dawng takpi in, Laisiangtho bulphuh a kigelh America Constitution pen tuni dong kum 400 bang akip suak in, a khek zo om nawn lo phial dingin kiciamteh hi.
America gamah tuni dong kumpi thak khat a kiteel simin Lai Siangtho tawh kiciamna nei sak uh a, Congree thu vaihawmna khempeuh thungetna tawh pan den uh hi. US sum (Dollar)tungah Laisiangtho mun, “ Ei te’n Topa I Muang hi” (In God We Trust), Late.31:6 gelh uh hi. US pen Pasian min tawh bawlsiatna thuak khualzin mite khuasat ahih manin, tuni dong thupha ngah gam minthang pen suakin leitung vangam (Earthly Paradise) kici zawzen hi.
Hun hong paitoto in America gamin suahtakna (Independent) hong ngah khit ciangin, US Congress in kum simin lungdamkoh Ni neih ding thukimna nei hi. US President masa George Washington in November 26,1789 ni pen US gambup lungdamkohn Ni (US Thanksgiving Day) a zat dingin pulak hi. Ahi zongin a ma khit a Kumpi sem President Thomas Jefferson, leh Andrew Jackson te in thukimpih lo uh hi. Tua banah US tualgal (Civil War) bei khit 1863 October 3 ni in US President Abraham Lincoln in America mi khempeuh dong kik a, November nipi nunung, nili ni (The last week of November Thursday)pen National Holiday dingin kipsak kik hi. 1939 kum ciangin US President Franklin D.Roosevelt in zum nasemte leh vanzuak vanleite in Christmas ma tawl khat sung vanlei theihna ding ngaihsutsakna tawh nipi khat a manlang zaw dingin geel leuleu hi. 1990 kum ciangin President George Bush in hih ni mah hong zangto hi.
Hih US Thanksgiving Day kibawl ciangin Sai Ak sa leh Vaimim tui huan uh hi. Tua Sai Ak tuihuan leh vaimim a deihna bulpi pen abeisa hun khat lai a khualzin (pilgrims) a pu, a pate phawkna ahi hi. Tua banah Sai Ak lim, vaimim gau lim leh singgah lim tuamtuamte inn zepna in nei uh a, Letsong in zong kipia uh hi. Khritian Khualzinte tangthu (The Pilgrim Story) pen US tangthu sungah abeisa 17th, 18th, 19th, 20th ,21st Century leh mai lam hunsawtpi ah a mang ngei nawn lo dingin kiciamteh hi. Tua bek tham loin Pilgrimte phawkna dingin ,Pilgrim Hall Meseum, American Meseum of Pilgrim Possesions kici
No.25 Court Street, Plymouth, MA, USA ah Inn lianpi khat kilam hi. Tua innpi sungah
“Tanglai Pate upna’’cih laimal kigelh asim kha khempeuh cimul thosak mahmah hi.
Zomite zong abeisa i nuntakna leh i piankhiatnate en kik leng minam neu khat leh ui le vok tawh anne khawm, silh le ten neilo, lai zong nei loin zu le sa tawh kidiah i om laitak America gam pan sangmang Carson, Nelson, East, Johnson leh Cope topa tein lungdamna khuavak hong puak uh hi. Cope topa in Jesu Khrist lungdamna thu tawh kiton in Zomi lai hong bawlsak a, hong tung ding 2010 November sung ah Cope topa hong tunzawh kum (100)cin na leh Zomi lai neihzawh kum (100)cinna pawipi Tedim khuapi ah kibawl ding hi.
Zomite sungah mipil, misiam, mihau, milian tampi i om a, khuapi khuaneu ah i teng zihziah hi. Khuapi khuaneu ah kizopna Mawtaw lampite i bawl zo a, Mawtaw leh neih le lam tampi i nei hi. Tua Jesu lungdamna khuavak in i mit hong hon sak, hong vak sakin , tuni in Zomite leitungbup ah ih kizel hi. Ih tuntunna ah Zomi Innkuan, Zomi Christian Felloship, Zomi Association cih bangin kipawlna ih nei hi. Tuabek tham loin Leitungbup Zomi Innkuan Kipawlna (Zomi Innkuan International) nangawn ih nei ta hi. Zogam, Kawl-gam leh leimong dongah lungdam na thutang ko dingin Pasian in hong zang hi. Hihte khempeuh i etkik ciangin Pasian pen Zomite Pasian ding mahin teel taktak ihih manin thupha ngah Zomite i kici hi.
Thukhupna:
Tua ahih manin Zomite Pasian in thupha tampitak hong piaknate hangin Topa tungah lungdam i ko ding hi. Thupha ngah minam i cihte pen lungdamko siam minamte ahi hi. Pasian pen Lungdamkoh a deih Pasian ahi hi. Na thuphate khat khit khat simsim lecin, Topa in a tampi hong pia na thei ding hi. Topa pen kei ma luah dinga ka teel, kei ma muanpi na hi a, kei ma ngah ding khempeuh na khut sungah om hi. (Late.16:5)ci-in, tukum Zomi bup Lungdamkoh Ni (Zomi Thanksgiving Day), November 26,2009, ni ah Pasian hong piaksa thuphate tungah lungdamko in, hong piak lai dingte hangin a minphat kholkhol leng Pasian lungkim semsem dinga, i mimal, innkuan, i pawlpi leh i minam bupin thupha ngah semsem ding hi hang. Lungdam koh biakpiakna tawh Pasian pahtawi ciat ni (Late 50:23)ci-in i kihanthawn hi. Lai sim mimal kim tungah Pasian in thupha hong pia hen.
Minam a ding deihsakna tawh,
Sia Khampeek(Tongsan Pu)
Norway
www.tongsan.org
 |
