November 24-29,2009 sung a kinei Zomi Siamsin Kipawlna(Universities-Myanmar) tawh akivai hawm Siamsin Seminar III, Post-2010 pen Pasian thupha le Zomi nulepa ulenau huhna tawh nuamtak kizo hi. Seminar hunsung teng buaina tuamtuam omta leh Pasian panpihna tawh nuamtak in kizo thei a, siamsinte zong sangkah na muntek ah cidam in ciah kik thei uhi. Seminar hun sung in, kumkik a ding makai thak ding ki telna zong ki nei thei hi. Mai kum 2010 ciang in a lem theih pen leh Yangon ah bawl ding ki khensat hi. Yangon ah lem kei leh Tonzang, Zogam ah ki bawl ding hi.

Siamsin Seminar III Vai Thu Phulakna

Nov 24- 29, 2009 sung Tedim khuapi, Khuado Hall ah a kibawl Kawlgambup Zomi Siamsin Seminar III thu a tom in a nuai a bang kong suaksak uh hi.

November kha kipat pan kipan in Tedim Siamsin Innkuan in Khuado Hall puahna le Siamsin Seminar III adding kigin kholnate nei khol uh hi.

Nov 20 ni in Siapi Prof Dr C Thang Za Tuan vanleng tawh Kawlpi hong tungto hi.

Nov22(Sun) ni in Yangon pan mi 2 le Mandalay pan mi khat a kigawm thum Kawlpi hong tungto uh hi.

Nov 23 (Mon) ni in Sitni Pu Cin Sian Thang Kawlpi hong tungto thei hi.

Nov 24 (Tue) Kawlpi pan Siamsin mimal 90, khang lampan thum tawh Pa Kai Sian Mung( Shalom) te bus zangin Tedim khuapi ah kikahto a, nitak lam nai 2:30 pawl in Tedim kitungto hi. Prof Dr C Thang Za Tuan le azi, Sitni Pu Cin Sian Thang le a tupa khat zong Siamsin makai khat in van in Airport Store ( Emung) mawtaw tawh hong kahto uh hi. Hong kahto khempeuh Tedim Siamsin te in cycle tawh Siazang khua khung ah dawn uh hi. Tonzang Siamsin te zong sun 11:00 hun in Tedim hong tung thei uh a, mun tuamtuam a om Siamsin te zong hong tung ngei ngai uh hi.

Tua ni nitak lam nai 6:00 hun in Khuado Hall ah zinmuak kikhopna le mun tuamtuam a om, Siamsin te min phulakna le kilawmtatna kinei hi. Seminar pai khem peuh Utong, Vaphual, Vamim, Muvanlai le Simbu ci in group nga in kikhenna kinei hi.

Nov 25( Wed) Siamsin Seminar III honpawi zingsang nai 9:30 hun in kinei thei hi. Hunhon thugenna Pa Thang Khan Kham ( Pa tawng) , Lamlah thugenna Township Secretary, zinmuak thugenna Township Education Officer le Seminar thu teel genna Tg Sian Nun Siam te in hong nei uh hi. Hunhonna aman ciang upa hong kihel thei teng zin vakna kinei hi. Tua khit ciangin Siapi Prof Dr C Thang Za Tuan in Post 2010: Social & Culture Advancement among Zogam cih thulu tawh Seminar makaihna hun kinei a, nitak lam nai 4:00 hun in Seminar masa kiman hi. Nitak hun ah Debate kidemna le kilawmtatna tuamtuam kinei hi.

Nov 26( Thu) ni pen Sitni Pu Chin Sian Thang Seminar piakni ding hi a, thuneite lamlahna hangin Sitni pa hong kihel theilo hi. A hih hangin Pasian huhna tawh thusinna le hanthotna tuamtuam kizom suak thei hi. Zing hun in Dr H Gin En Cin ( ZCA, coordinator) le Sia Thang Nen Pau ( Editor of Chief, Zangkong Awging) te in muhsak thu genna hong nei thei hi. Tua a man ciang, Tg Sian Nun Siam ( Senior Editor, Zingsol, Mdy) in Media cih thulu tawh thusinpihna le News Letter or paper hawm ding hi leng bagn ci bawl ding cih thulu tawh Workshop bawlna te hong nei a, Siamsin sungah Media khanlawhna thak khat hong om hi ci in Siamsin khempeuh in tha ngah mahmah hi. Nitak lam hun ah Tg Zam Thuam( pawllutang, ZSK, UM) in “ Power” cih thulu tawh thusinpihna hong pia in global financial crisis zong a muh zia genna hong nei hi. Tua khit ciang Prof Dr C Thang Za Tuan in Globalization tawh kisai telgenna khat le Sia Thang Nen Pau le Dr H Gin En Cin te tawh dotna le dawnna te kibawl khawm suak hi.

Nitak hun ah Tg Langh Do Lian gelh, “ I kisi hang lei bek mah a sik hilai” cih thulu tawh Pilna pen hun a om lai zon theih zah zon ding thapiakna a bulphun, opera kidemna kinei hi. Tua aman ciang sun hun a kisin media tawh kisai Seminar sunga thupiang tuamtuamte news in gelh in simna tawh kizom suak hi. Hun man ma in “ Innkuan nuam khat hihna ding numei te thupi zaw hi” aih keh “ pasal te thupi zaw hi” cih thulu tawh man I sak zawna lam thu in thu kinialna kinei a, suakta tak in thu kigen ziahziah hi. Hi hun ah thu sau vei a gen pen te in minute 2 bek genkha ahimanin mi tampi ki hel thei hi.

Nov 27 (Fri) ni in mipi in Siamsin lapi sakna tawh hun kipan hi. “ Mite bang ci zawh ding” cih thulu tawh Siamsin Senior khat ahi Tg Thang Sawm Lian Tuang(ME) in thusinna hong neihpih hi. Tua amang ciang Senior khat mah ahi Tg Thawng Sian Sawn Mang in “ Lungsim puakzia” thulu tawh workshop le thusin pihna hong nei hi. Tua hun sung in Sia Gin Sian Pau in thapiakna thugenna hong nei hi. Zingsang nai 9:00 pawl in Sitni Pu Chin Sian Thang in Kawl lam hong zuansuk kik hi. Siapi Tuanno in Seminar thukhupna hong neih pih a, Zomi sung a khasiat huai thute a gen kawm “ Gen gen nawn kei ni. Gen gen leng khasiat suak, hong kitom kha ning” ci in khasia mahmah kawm sa in thukhupna hong nei hi. Kaptel a pai sawm kimlai, Siamsinte ta-ngah ding a lua na tawh a khualzin ding phiat in Tedim ah hong tam suak hi. Meeting ahi man zah kinei suak hi.

Nitak hun ah Pa Zam Cin Pau@ Zozam hong tungto thei ahimanin “ Post 2010: Sustainable Development for Zomi” cih thutawh Seminar pia in dotna le dawnna tawh kizom to suak hi. Tua ban ah Siamsin makai masa khat ahi Dr Tual Khai in Siamsin Kipawlna tawh kisai hong pianzia le hanthotna hong nei beh lai hi. Hi ni in a lamdang khat ah nitak hun khuavot mahmah lai tak in Pa Zozam in zopuan bantawng khat tawh Seminar hong pia hi.

Nov 28( Sat) ni Rih tuili ah Excursion kipai hi. Hai mual mataw thum tawh mi 152 kipai thei in sunan puakte Rih ah tawl ngatkawm kine zihziah hi. An hong kicing lo ciang Rih khuadar Towship Chiarman te innkuan tungah Phone tawh huh kingen a, buh a kisam le meh akisam lai te hong sik ban ah niangtui kham ikek in hong vah lai hi. Ciau gamgi lei ah zong kihawh a, lei kan ding India lam thunei te in hong muak mahmah napi, Kawlgam thunei te in lei I alang ciangbek hong pai sak hi. Nitak nai 8:30 in cidam tak in Tedim khuado hall kitung kik thei hi.

Nov 29(Sun) ni in Khuado Hall ah biakpiakna kinei a, tua mun ah Rev Kham Sian Khup(Bethhel AG ) in hanthotna hong pia hi.Kikhop man khit ciang meeting ki zom suak a Gambup siamsin panmun leng thak telna le mailam kalsuanna ding thukikupnate tawh kizom suak hi. Sun nai 2;00 hun in Siapi Dr C Thang Za Tuan te nupa le UCF seminar khat a va kah ding Tg Go Sian Langh in kawllam zuan khol uh hi.

Zan hun ah Siamsin Seminar III mangpha khakna le lasakna pawi kinei thei hi. Siamsin makai thak te gel in makaih na ding tawh kisai a lungsim puakzia te uh pulakna, Pawllutang lui I mangpha khakna, Senior makai Pa Michael Suan Lian Pau hanthotna, Siapi Ngin Khan Khual i lamlah thugenna le Sia Gin Sian Pau i Panmun len thakte apna hong neihsakna te tawh hunmasa kibawl a, hun nihna ah la tuamtuam sakna le news sim na kinei hi. Hun thumna ah Siamsin Lia le Tang khempeuh Zola sa in Zolam vui in nasiatak in lam na tawh kizom a, gualnuam tak le suakta tak hun a kizat khit zan kim ciang in Siamsin Seminar III nopci tak le picingtak in kizawhna lungdam kohna le tangkona Tg Sian Nun Siam in hong nei a, khitui luang naptawlh liang in lungzuang sa in Seminar III mangpha khak in zan hun kizang hi.

Nov30(Mon) Zingsang nai 8:00 hun in 2008-09 EC meeting nunung le 2009 -10 EC meeting masa Tedim khuado Hall ah kinei hi. Sun 11:00 pawl in No 1.BEHS Tedim sangpi ah Siamsin bup kihawh in tansawm sangnaupangte kahna sangkhan sim ah hanthotna kinei hi. Tua mun pan Kawl lam ciah ding te kiciah suak a, nitak lam nai 4:00 hun in kawlpi kitung kik thei hi.

Thuciamtehpi, Siamsin Seminar III -Langh Do Lian

Zahtakna lianpi tawh,

Tg Kham Sian Sut, Thuzekpi

Zomi Siamsin Kipawlna

Comments (1)

zogam said:

... Panmunlen teng Pawllutang - Tg Chin Suan Kap BE EP (Q) Yangon Ahuh 1 - Tg Do Lian Khai BE EP Monywa Ahuh 2 - Tg Hang Za Dal BTech Civil 2nd Kalay Thuzeekpi - Tg Kham Sian Sut BCSc 3rd Kalay Ahuh 1 - Tg Kham Sian Thang BA Eng 1st Ahuh 2 - Tg Zen Sawm Lal UFL 2nd Chinese Mandalay Sumkem - Lia Vung Khawm Nuam Computer 2nd Yangon Ahuh - Lia Vung Sian Cing BNSc 2nd Auditor - Lia Man Nem Dim Monywa Ahuh 1 - Lia Esther Niang Dim Kim Monywa Ahuh 2 - Lia Thida Vung Sian San MC Magwe Accountant - Lia Dim Lawh Nuam Co-Operate 3rd Yangon Fund Raising - Tg Zam Thuam BTech EC 2nd Kalay - Tg Pau Sian Mung - Lia Niang Sian Lian Senior Friend - EC lui khempeuh Media - Tg Bosco Nang Suan Lian Kalay - Tg Kham Go Cin Tuang Mandalay - Tg Pau Sian Dal Monywa - Tg Mang Sian Mung Yangon - Tg Khen Sian Kham Magwe 2008-2009 UM General Meeting tawpna thukhensat teng 1. Siamsin = Tan sawm zo khinsa kumpi theihpih pilna sang sinna sang khat peuhpeuh ah sangkah Zomi sangnaupang khempeuh. 2. University of Distance Education sangnaupangte zong Zomi Siamsin Kipawlna in a huam khin. 3. Siamsin Seminar IV pen Yangon ah kibawl ding (lemlohna a omleh Tonzang Khuapi) hiding. 4. Seminar pen 2010 November kha sung hi ding. 5. Siamsin Website neihsuak ding thukim. 2009-2010 UM EC Meeting masa le 2008- 2009 EC Meeting nunung thukhensat teng 1. Siamsin Seminar IV lutman ding nungkum tawh kibang ding. 2. Siamsin zum khat phut zawh nang thuzeekpi in vaihawm ding. 3. Siamsin sung laihawm khempeuh Siamsin Media Groups pan hi ding. 4. Siamsin Media Groups sung a thulela te reference tawh suaktatak kila thei ding. 5. Media Officer te Siamsin Website ah administrator hipah ding. 6. Siamsin Mailing Groups ah lai khempeuh khaihkhia nawnlo ding. 7. Siamsin Website ah Web Developer Tg Khen Siam Kham (Magwe) hi ding. 8. Siamsin Seminar III record laibu pen A5 laidal tawh hawmkhia ding. (Cover Full Colour) 9. Siamsin UM EC Meeting pen May kha sung Mandalay ah kibawl ding. Mandalay Siamsin in vai khempeuh pua ding. Tg Kham Sian Sut Thuzeekpi Zomi Siamsin Kipawlna Universities - Myanmar

December 10, 2009

Name

Comment

smaller | bigger

Write the displayed characters

Add Comment