Kongit Zomi Vontawite aw,

Zomite nidangpek aa kipan gaalhang minam aa leitung na ngawn ah a minthang ngeite ih hihna phawkkik in tulaitakaa midangte’ gam le lei-ah ahilo eima Zogam leitang tung teekteek dongah hong ki tawng/to [challenge] phamahmah ahihna thu pen ihsanggam gaalhang nihte’n a nuntaakna uh a hongpiakkhiatna dong-aa a gam leh a minam a itna uh ahonglah khiatna uh pan in a theikhiapan ka hihi. Hithu-ah a nuntaakna a hong piakhia ihsanggam it nihte a masapenpen in minphatna, pahtawina sangpen leh zahtaakna lianpen ih piamasa hi.Hehnep siampa Huhpa Khasiantho in a heh a kap teng hehnepna bucing nong na piaksak ta hen.

Tu-in a thu phamahmah leh athukinpha mahmahkhat-aa ih ngaihsut ding ah ih pu ih pa hunlaipek pan-aa akilel ngeilo hih Meitei singnuai mite ei khanghun ah leh maikhang hunah zong ih biak PASIAN in cikmah in hong lelsaklo ding hi cih upna leh muanngamna tawh hangsantakin ihsisan a nunung pen a taak dongin Zogam leitangtung pan Meiteimi a kici himhim phialmang, notkhiamanggai mengmeng ding hihang! Eimau pantheihna a munmun tek pan in mapang khawmni ci-in kongzawn hi. Pasian’ naseem te’n thungetna tawh, Sumzongpaaizongte’n Sum le Paai tawh, Tangval thahatlai te’n Ngal le Tha tawh, cihbangdaan in ih pantheihna bangbang tekah mapang in mainawt in Zomi Khangno gaalhang te in ih sanggam it Pvt Taang Taang Thang Za Muan @Mark leh Pvt Taang Thang Min Lun @ Tiger te sisan phulatatak diing hihang! Nungkik ngeilo ee Zomi Vontawite! Gualzawhna in ih maimahmah ah hongngaakta hi. Hangsantak in maban zomto ding hihangh (Isa.41:10-13).

Pasian’ deihna tawh kituakkei ci ken, 1997 hiam khat in Nagaland police te leh Assamese police te a minam un avui atang tawh nithumsung ki naakkaap mahmah ngei uh hi. Eastern Theological College, Jorhat, Assam State, India ah B.D. ka kahhuamsung teng khat hi aa ka Naga lawmte khat in a nuai-a bang in hong gen hi.

Pasian’ mizat mahmah Lotha Naga mimalkhat kiangah, Pasian in, “Na mite leh Assamese te kisia a hihmanin gamgii ah pai inla, an nelo tuidawnlo in thungetsak in; ka hong ciahsakkik hundong na kilehkik keidinghi hong ci-in; tua leh kei zong paipah vingveng in ka thu-ngah bang a kavasep leh nithumna ni sunlang khit teh Pasian in, “Kicingtahi ciah-in ci-in hongsawlleuleu teh ka ciah leh na vengtakpi in kilemna bawl ana sawmta uhahi” cii hi.[1]

Tuatung in Assamese te amilip in tamzaw thamtham na pi-in, kilemding ngen masa uh-aa a nuai-a bang in thukhupna khat nei-in kigen kikhi. “Assamese te ii muhna ah Nagaland pan in thautawi vive gaalhang a tulza simin hong kuansuk ziahziah in ka mu uh in zokeini” ci-in ki genkikhi. Nithumsung a sawtna ah Assamese te 600 pan 700 kikaal asi dingdaan in kigenhi. Leitung theihkhaakpih ma in kilemnang in Assamese te’n kunkik masa ahihman in kilem kikpah uhhi.[2]

Mii a-ommuang khat va sugawpni a ci ka hihlohlam ih theih tek ahihi. Mi akilalsak te in ih gam ih lei hong tuatcil sak tazen hilo ahi hiam? Zomi ka itna ka lahkhiatna’ng mun, Zomi na itna na lahkhiatna’ng mun a hihi. Hithupiang ka sim kawmkawm in ka thangpai-in kakhitui luanghi. TOPA’N Meitei gamnuaimi te a veksek un Zogam leitang tung pan kinot khia manggai leh cikmahhun in hong siikkik ngamngei nawnloh/ hongsiikkik zawhngeinawnloh nang in thuka ngen hi. Pastor te akipan Zomi Biakna naseem khempeuh in antang in ih omna muntek pan in thungetsak ding hihangh! Moses pen biakna makai leh gam makai hi-aa amipih Israelte a itman in Pasian in a naseem in zangh theipan bekhi. Minam itlo pii in Pasian naseem hi ing ci ngamlai ding ih hihiam. Zomi Pasian’ naseem khempeuh aw, ZRA leh ZRO a kipan Zomi te gaalmai ah a ding khempeuh te a ding in thu ngetsak ni! Ih minam ih itna lakkhia tatak ta ni! TOPA’N gualzawhna thupha a khang akhang in hong pia ta hen.

A nunungpenin ka gennop inah, Zomi Iskariot [Siakazuh]pawlte in amipih a sanggam te zuaknawnkei tahen, a itkei phial le zong zuakngamnawn kei beekhen. Abel sisan Pasian kiangah a kiko bangngei in ih it sanggam te-nih ii sisan Pasian kiang ah ki ko khintadinghi. Aminamte tua bang-aa azuakngam te’n a kilawm akituakbangin aluang abaan mah in asawndongin siansuah baihmahmah kullodingmaw! Guaite aw, tupan kipan khat le khat kikhual kithuhualkik tatakta ni-in, Phualva bang-aa ih pu ih pa te ki-itna mabaanzom in mainawt khawm mapang khawm aa ih sisan a nunung penpen a taakdong in nungkiklo, tonkiklo in gaalphualah lutciat ni! Ih guallelhna lampii gualzawh paisuakna tawh ih totkik zawhna ding, ih gam ih lei ih hutsuak zawhna dingin ih biak PASIAN in kithuhual-aa ih thungetna leh ma ihpan khopna tungtawn in na hongseem tatak tahen. Amen.

Khazih leh Minam Itna sungah,

Rev. Thang En Hen

Doctorate Candidate [Ecumenics]

Divinity School of Chung Chi College

The Chinese University of Hong Kong

Comments (1)

thang zomi said:

... dik geih....paih ding a om kei. Zomi,Zogam tangval..."No Retreat No Surrender" Pu Pa gam lei...Pasian hong piak gamlei...It in.Ching in,kem ni. IN GOD WE TRUST.

January 20, 2010

Name

Comment

smaller | bigger

Write the displayed characters

Add Comment