 A sawt lo-in Zomi Nam Ni hong tung ding hi leuleu a, tu kum zong leitung mun tuamtuam-a om Zomite in i minam ni bawl tek dingin kong lam-en hi. Leitung ah minam leh kampau nam tam mahmah a, tuate lak ah ei Zomite zong khat hi ngiat hi hang. A vekin Pasian' bawl hi a, hong piangsak Pasian ahih manin manpha kisa mahmah ing. Mite bangin leitung mun tuamtuam ka phak zawh loh hangin ka phakna sunsun-a a muh leh ka kimuhpih, ka kitheihpih minam lian pipi pawlkhatte ka muh ciangin," Hihte khat-a kipiang hi leh..." ka cih nop dekdek hun om hi. Ahi zongin ci kei ing. Bang hang hiam cih leh, Zomi khat-a hong piangsak Pasian ahih lam tel mahmah ka hih man hi. Hih America gam khawng, ahih kei leh Europe lam khawnga minam thupite gen taak loh, ei tawh kinai gam neu pawlkhatte bang ka et ciangin hampha mai uh hi. Gentehna-in, Korea bang en lehang: Mi awn 50 khawng pha uh, minam khat, kampau khat hi mawk uh a, kithutuah nading zong baih zaw pah tangial hi. Christiante bang in Laisiangtho bu khat zang khawm uh, Labu khat nei khawm uh a, tua pawlpite' labu, tua nu tua pa' bawl, cih bang zong om se lo hi. Encyclopedia khempeuh amau' kampau-in nei uh a, Time khawng, Newsweek khawngte a kipan periodicals khempeuh Manglai-a a suah hun lian mah-in amau' kampau-in suak lian hi, ci uh hi. Tua ahih manin leitung thu kha thu thei (ki-informed) mahmah uh hi. Laibu khat kikhen leh zong a lei ding mi om pah a, la album khat kihawm leh zong kikhawng pah hi. Ei Zomite' lak tua ci zen leh... ci kha zel dingin kithawi zel ing.
Ahi zongin Zomi-in ka pianga, Zomi-in ka khangkhia, i cih den mahbangin, leitung thu ah kiphatsak luat nading om kei phial ta leh zong Pasian in Zomi-a hong piansak ahih manin i kiphasak pah kei zongin "angtang" mahmah lel hang! Pasian in den khawnga i gen minamte khat-a hong piangsak thei lua, a kang hiahua khat, a ngo pengpang khat-a hong piangsak thei lua, i minam pau pen English khawng,German, French khawng, ahih kei leh Senpau khawng, Japan, Korea pau khawng a pau dinga tua mite khat-a hong piangsak thei lua, a lungsim bang uh gina tham, a mel uh zong eite sangin hoihzaw uh, pilzaw, thukhualzaw mai uh (e'n zong tuate a nei hi hang) hi napi-in Pasian in Zomi ding ngiat-a hong piansak ahih manin nuam mahmah ing. Koikoi ah i om zongin i minam bel laih thei khek thei kei ni - Zomi hi hang.
Tu'n Zomi Nam Ni khawng hong tung kik ding hi ta ahih ciangin postcard khawng, sticker khawng kibawlbawl ta ding ahih manin, English khawnga i bawl hun zong om ahih manin, ka kitheihsakna hi peuhmah lo-in (ka khialh leh hong hilh un), "I AM PROUD OF ZOMI" khawng ci-a postcard khawng, sticker khawng bawl-a leitung mun tuamtuam ah i kizelhsak zel ding ka launa tawh hih lai hong gelh hi'ng. A sau ding i deih kei leh (sticker sau lua zong etlawm lo mah ahih teh) "PROUD OF BEING A ZOMI" cih bangkhat-in gelh lehang, a ci nuam hi'ng. "I AM PROUD OF ZOMI" cih lian pen in khiatna nei pha lo hi, a ci nuam hi'ng (ka khialh leh hong hilh unla hong puahsak un, a thei zawte in hong gen un). I cih nop teiiteii leh, "I AM PROUD OF ZOMIS" ci lehanga, tua ci zel lehang lah "ei" kihel pha lo zel hi hang. Zomi a kicite a "angtanpih," "kisaktheihpih" cihna lam kaii kik leuleu zel ding hi.
Hong kuppih unla, ka khialh leh hong puahsak-in, "Hi mah" nong cihpih tek uh leh i khialh khak nawn loh nadingin puahpha pah lehang ut ing.
Rev. Zam Khat Kham
Concordia Seminary Graduate School
St. Louis, MO
 |
