Zomite i khuamuh kipatna pen Mangkangte ong uk a kipan tuciang kum 100 val deuh pha pan hi. First World War hong piankhit 1917-18 a eimi Piantit paite’n Gunkhawm khangsiah bang ah khua na om lailai zen veh aw ci uh hi. Nidang lai-in Meitei gun len Chindwin gun kituahna pen guntawbing a kici hi . Tua hun lai aa eimite 1000 bang Piantit ( France ) kipai-in a pualam khua muhna hong kipanpan hi.Tua zawh tulai tak i minthan sak mahmah ahi Malaysia gam khawng ah kitungin damdam in khua muhna khang hi. Zapan gal sung leuleu ciangin Mangkang, Kala, Gawlkha galkapte tampitak i gam ah hong om uh a hih manin i muh ngei loh mizia tampi i mukhia hi.

Tua bek hi lo motor lampite zong hong kito-in mortor car zong hong tungin kimu nuam mahmah lai hi.

I teenna innte zong bi leh suang tawh kilamin , tun hi leh inn kim siikkang tawh kilam ta hi. Khualzinna ah zong khe tawh kipai ngiatngiat nawn lo-in motor tawh kipai-in motor-cycle bang kilimzat mahmah ta hi.. Ih nuntakzia , an neek tui dawn zia , khualzinna , kihona ( telephone ), gamdang ,mundangte tawh thu kizakna ( TV , Email )te kikhangto in leitungthu zong a ni , a ni in kithei kim hi. San pilna lam ah zong a khangto sa gamte ih phaak zawh loh hang , tuhun khantohna lam ah kua mah kinutsiat bit thei lo a hih mah bangin a hanciam Zomite tampi mah in midangte pilna theihnate kipha zo veve hi.

Tua a hih manin ei Zomite pen i kiim i pam mitmuh (a kimu thei ) khantohna ah , a hun tawh kizui-in thumaan thutak, thuhoih thupha tawh i khantoh nading kisam hi. Leitung gam tuamtuam, minam tuamtuamte sung ah ngeina leh thubulphuh (philosophy) hoih nei, thuman thutak tawh a khangtote gam mah gamnuam suakin, a mite zong mihoih , mipha minamte suak uh hi. Ei Zomite

zong pu le pate pianpih i ngeina hoihte leh thubulphuh hoihte i neih mah bangin, taute tawh a hun tawh kizui aa i khantoh ciangin minamlian, et-tehuai minamte ci-in leitungbup ah hong kiciamteh ding hi.

(1) Beh leh phung :Sung leh pu, tu leh maak, sanggam, bangkua, thusa, tanu, tanu khaak, zawl, nuphal cih bangin sehsa-in kinei dimdiam aa, tuate-in ih sih, ih kah, ih dah ni, ih nopni-in a mau tavuan ciat kuamah sawl tawm kul lo, sum bei kul lo-in sem pah diamdiam ding uh hi.

(2) Ih minte nangawn ut peuh kiphengsap thei lo-in tap kinei aa, tua a tapte ii nuntaakna zui-in min kiphuak hi.

(3) Ih pu ,ih pate khan lai-in galhat, sakapna kidemin, tua zong amawkna hi lo-in,a sih uh ciang a khate amau sawltak ding, a samatte masuan ding, Sai bang a mat leh zong a Sai tung tuangin, sihkhuamual suak ding cih kidemna hi.

Hih thute kong genna ah, i ngeinate hoih a hih manin zui kik ni cihna hi lo-in, i thuzungpite (essence), i ngienate kepcin ding thupi hi cih nopna hi. Gentehna ah ,i pu i pate thuman thutak tawh na nungta uh hi. A nuntakna vuah zuauthu kihel lo, deihsakna kizang lo, ki-aangvan thei tuan lo uh hi.. Khuakhat leh khat kido kikap na pi,a a galte khatin a inntual tui a dawn khit naak leh thah na’ng thu om nawn lo hi. A that teitei leh tuaal that kiciin (old-blood murder) a gam phu zo nawn lo hi. A khangto gamte Upadi tawh kibangphial hi. Lolam ah inn sing suih sa khat peuh in a koih leh, a tuak khatin a inn dong puak sak hi. Tuhung ciang belh a guuk kei leh ken ah kitholhsuk sak hi. Numei ,Pasal kikholhna ah zong kiphengtat peuh mah lo-in nupa a suah khit ciang bekin om khawm uh hi. Nupa nangawn Salian beng ding leh gal a kuan ding zan pen a zite tawh kum khawm lo hi. Kikamsia ci zen uh hi.

Ei Zomite’n thubulphuh hoih , ngeina hoih , thuman thutak hoih te i neih mah bangin, i kiim i pam, leitung khantohna tuamtuamte tawh hun zui a i khantohna ah, pu leh pate ngaihsutna leh ngeina hoihte bulphuh siam leng a et-teh huai minam khat i suak ding hi. A hi zongin, i ngeina hoihte lak ah, beh leh phung i kineihnate-in khat leh khat ki-itna kihuai nading a hoih mahmah kipawlna hi na pi, minambup khantoh na’ng taktak ah tua beh leh phung in hong ciangtan, hong khaktan hi ci-in ka ngaihsun hi. Minam khantoh nading beh leh phung masa sak lo in i minambup mah lian sak zaw ni. Khat leh khat kihuai nading bekin beh leh phung zangin thulian tawh kisaina mun ah i minambup mah thupi sak le’ng kipawl theihna , kithutuakna om thei pan ding hi.

Mi pawlkhat in, ei beh leh phung sung mah zang peuh leng kua mah dang konlawh kul kei a kici ki-om khathei hi. U te naute aw, tuhung ciang kipawlna lo tawh khantohna om lo-in, kua mah in ma nawt zo tuan lo hi.Ei beh leh phung ciangciang cih gen loh, a mau gam khat ciatin leitungbup nangawn a makaingap, a makai ngei a hi Europe te bang kipawl khat in, sum zat nangawn (Euro) kibang sak uh hi. Kipumkhatna lo tawh ma kinawt zo lo,kikhangto zo lo ding hi. Sanggam Khalkhate , Falamte sang mihau , mipil ih tam hang,a mau hong lauh lo na pen ei Zomite kipawl thei lo , kipumkhat thei lo lua cih hongtheih man uh a hi hi. Kipumkhatin kithutuak, kipawl thei le’ng thahatna (power)lianpi hong piang ding a tua thahatna in i khangtoh nading hong makaih dingin mi nuai ah ki-om ngei lo ding hi. Zomibup kipawl theih nading mah bulphuhin hanciam ciat ni. - MOMNO lom XVII , Hawm 6

Comments (0)

Name

Comment

smaller | bigger

Write the displayed characters

Add Comment