|
 Tu teng net sung thu kigen tuamtuamte ka sim kawmin tu laitak Zomite' sung Talpakte' hong nopnehna thute leh Kawlgam ki-ukna tawh kisai a i tuah khak thute ah Zomite a meidawi-in hong kiciamteh tam? Ahih kei leh apahtak huai ahangsan Zomite ci-in hong kiciamteh tam, cih peuh ka om muanin na ngaihsun zel ing.
Khat veivei siamsin ka hih manin lai bawl ding tam mahmah kim lai hibang thute pawl in ka lungsim hong luah cip zel hi. Kei lei kei kiho kidawngin "Zomite pen a phut khak uh tangthu ah meidawi ngei lo ding uh hi, cih ka phawk hi.
Zomite pen mi hangsante' nung thuap ding bek hi lo, a kul leh phumasa a ahangsan dingte hi hang, ci-in khangthakte' lungsim ding ka upmawh sansat hi. Korea ka tun zawh kum khat pha nai lo a, Korea gam khantohna ahang bang hiam, ci-in lawmte khat le nih ka dong zel hi. Ka lungsim hong khoih kha pen thu in a haksat pen lai tak uh a Biakna makaite' (Pastor/Upa/LST Sangsia/siamsinte) leh University Professor/siamsinte' makaihna, hangsanna, kipiak zawhna leh thuakzawhnate ahi hi.
Tu zawh kum bangzah hiam khat ciangin tulaitak a i tuah khak thute pen tangthu hi ta ding a, tua tangthu a kisut ciangin tulaitak a biakna makaite, minam ka it hi acicite, Pasian ka um hi ci a kha mi akisa mahmahte, siamsinte... bangcin hong kisut kik tam, ci-in ka ngaihsun zel hi. Zomi deih phadiak teng pen sep nei mel lo ei teng kinialnial i hih manin gual in phai in hong kheng dek a, a lawhcinnate uh leh international in a theihpihnate khawng i muh ciangin i haza mahmah ngeingai ta hi. Thu phawk huai hi. Makai hoih, khangno hoih i cihte pen mi nung a zui bek hi lo, mi' sialsa lampi a tawn bek zong hi lo, a kul leh lutang kham a lamthak a sial ding i hi hi. A kul leh zong thu phuangkhiate i hih ding thupi hi.
Kawlgam vai diakdiak ah zong mi' kipat peuh, mi' sep hun peuh ngak ni loh lo a "Tangthu ah a meidawi ngeilo Zomite" i hih ding thupi hi. Pu Cin Sian Thang-te innkuan etteh ni. Panpih ciat ni. Kiging khol ni. Tu ngen i bat leh tangthu ah ameidawi Zomite ci-in mite in hong mu pian uh ahih manin hong kinopneh ta a, hong kithusim nawn lo pian tawh kibang hi. I pasal tat kei leh i luzang pan hong kituat cil ni ciangin i kipek khia zo nawn kei kha ding hi.
Zomite i tuahkhak thu ah i dual kei ding a, bangbang tangthu i mai ah hong piang ta leh i meidawi ngei kei ding hi. Gamsung gam pua a om khempeuh tu lai tak bang sem ding, cih i theih pah nai kei leh zong vai khat peuh hong om leh phek a sa thei dingin a kithawi sa-in om ciat ni. Topan Zomite hong kem hen la, midang tampite' adingin thupha hong suaksak ta hen.
I thalakna ding:
1. We are made wise not by the recollection of our past but by the responsibilities of our future. (A beisa thute kaihkhop kikna pan a pil hi khang e, mailam i phut khak ding thute hangin a pil hi zaw hang).
Bangci i sa a guai? Nidang a i pu i pate' hangsanna leh minthanna teng sut kikkikin laibu sahpi khat i bawl phial hangin tutak i tuah khak thute leh i mailam ding khualna tawh i sep khiat kei leh apiang lo ding hi mate? Ei' khang hunin ei mahmah i dian khiat kul dan hi.
2. Fear always springs from ignorance. (Launa pen thu theihlohna pan hong kipan den hi).
Lau huai hi, thukante om hi... cihte pawl a kipan tulaitak a Zomite hong meidawisak thu tampi pen i thu theihloh man hi takpi leh kilawm mate? I pu i pate' hangsanna teng gengen in ei i meidawi leh bel zum huai ngel ding ai ve.
3. Ships are safer in the harbour, but they are not meant for that purpose. (Tembawte pen a khawlmun ah koih thapai leng lauhuaina tuak lo pen ding hi. Ahih hangin tua bang dingin a kibawl hi lo hi).
-Zomi khangthakte zong tembaw bangin ngaihsun leng khawlmun ah lauhuaina tuak lo pen ding hi napi hang tuabang ding a hong kibawl hi lo ahih manin a lawhcing dingin tuihual leh huihpi kipei ta leh tuate lakah a hangsante i hi hi. A pai teitei, a phu tantante hi hang ci ing. Bangcin na mu a lawm? Deih kaih lua nong sa na?
4. Success is not something to wait for, it is something to work for. (Lawhcinna i cih pen ngak zawh thu tawh apiang hi lo a, sep a kul ngiat ahi hi).
-Hi taktak mate? Zogam pallun ding, Kawlgam democracy ngah ding.... ci in sem lo a a ngak tam lua i hi tam tu dong i ngah loh? Kisai kei na sa mai na leh... Ngak zawh zong thupi sam na ven sep ding zong mangngilh kei ni mate.
5. Put your trust in God and keep your powder dry (Pasian muang in la na thauvui zong dol sak kei in).
-Pasian muang cih ciangin ei lam pang sep ding bawl dingte leh kithawi kholh dingte kimangngilh kha pahpah mate. Tuhun Zomite i thauvui bang ahi tam lawm? Lawm Langh Suan Cin Zomi bang phawk peuh mah hang e.... 'lawm' cih kammal i zat leh!
Hih paunak leh thupilte pen a gente kua hiam cih tel kim khin lo ka hih manin a thu bek hong suaksak hi mai phot ing. Tangthu sungah a dual ngei lo Zomite Topan thupha pia ta hen.
 |
