|
Zomi Laizom u leh nau,
Sak leh khang, suah leh tum, leilu leitaw aa om Zomi kampau laizom khempeuh Cope Centennial Jubilee min tawh kong hopih uhi. Ih Biak Pasian’ thupha hangin i tuntunna peuh ah Amah ih mangngilh loh manin kana angtang mahmah uhi. A mah Pasian ahong piangsak Pa ih phawk theih nadingin bangmah theilo in ihom laitak a thupha hong puak dingin ahong sawl Sangmang Rev. Dr. J. H. Cope-te nupa
ih Tedim leitang ahong sikzawh (1910-2010) tu-in kum zakhat hong cing ding hita hi. Hih Sangmang Cope topate nupa- in Pasian’ thu nungta ahong hilh bek lo-in, ih lai ding ABC bulphuh in Zolai hong bawlsak hi. Tua ahih manin Cope kum za cin ih cih peen Khristian kum za bek hilo-in Zolai kum za tawh gawm dingin geelna kinei hi.
Abeisa ah Cope kum 25 cinna 1935 kumin kibawl kici aa, ciaptehna gina kimu zo nailo hi. Cope kum 50 cinna 1960 kumin kibawl aa. Cope Jubilee Church (tu-in CMBC-Tedim) Biakinnpi honna pawipi tawh kithuah hi. Cope kum 75 cinna 1985 kumin kibawl aa,CCOC palai mi 100 val khahkhiatna tawh kithuah khawmhi. Cope kum 100 hong cin’ ciangin Tuiphum Pawlpi in “ A beisa ah ei kia-in ih bawl tohtoh pen hampha lua hang, Cope ih cih pen eimi Khristian khempeuh leh Zolai a zang khempeuh ii Sangmang Cope ahih teh sak leh khang, suah leh tum aa eimi Khristian khempeuh leh Zolai a zang khempeuh in Cope 100 ih muak/dawn khop nadingin ih phakna ciangciang taangko in hanthawn ni” a cih ban vuah, Pawlpi (Denomination) tuamtuam in zong, “Cope topa Jubilee pen no Tuiphum (Baptist) te’n no kia bek in na bawl den keei uh hampha lua uh teh, no aa kia hilo aa Zomi kampau Khristian khempeuh Zolai a zang khempeuh in ih bawlkhop ding hi, no hong madawk unla, maa hong pan in hong taangko un,” a hong cih uh ciangin Tuiphum Pawlpi (Tedim Baptist Convention) in tha kingah mahmah in maa a hong pankhia ahi hi.
Tua tawh kizui-in “A beisa in Pawi a kibawl teh neek leh dawn vive in hun kizang/kibeisak aa, tutungin kum 100 cin ahihmah bangin Pawlpi namkim in zattaang theih ding innpi khat lamle’ng” cih upate’n ngaihsutna kinei hi.
Hih tungtawnin Cope Centennial Hall ading geelna kinei a, a masa geelna ah dangka sang Ks. 5,500 (tein 5,500)bei ding hi-aa, haksa kisa pian hi. Tu’n kigeelphakik-in kizo nailo ahihman hong kisuaksak zo nailo hi. Ahi zongin a tawmpen dangka sang Ks, 1,000/-(tein 1,000) vaal bei dingin kingaihsun hi. Hi tawh kisai-in, “Dangka (sangkhat) Ks. 100,000/- pan a tungsiah a pia zo ding mi tulkhat (1,000) ngah le’ng kidingzo ding hi,” cih ngaihsutna om in, Tedim khuasung leh Yangon ah innvakna akigawm inn 350 valte’ tung pan hanciam nading hong kamciam leh hong piapia zong pawl khat omkhin aa kivakvak lai ding hi.
Sum leh paai tawh ma ih dinkhop nading ah, pawi ading leh Cope Hall ading namnih in khen hong kul ding hi. Tua ahih manin leitung gam tuamtuam aa om u leh nau, mipih cipih khempeuh in ih tha ih ngal ih neihsate gawmkhawm aa Cope kum 100 pawi ading maa pangkhawm dingin Khrih min paulamin kong zawn uhi. Taanglai aa kipan tuni dong Zogam keu gawgam ahih lam ih theihsa ahihmah bangin Kawlgam sung-aa te’ tha tawh hih Pawipi pen kibawl zo hetlo ding ahihman, mun tuamtuam aa om Zomipih te’n keu gawgam ahi Zogam a nelsak, a kawtsak, a niimsak dingin na gam na lei na mi na sa-in tuni-in nang hong ngak gige hi, cih a kua mapeuhin nong phawk nadingun, kong taangko uhi.
Pasian in ih maban ciat ah hong panpih in maa hong tutpih ta hen!
Rev. Thang Go Khup, Secretary
CCJ Main Committee,Tedim.
E-mail:
This e-mail address is being protected from spambots. You need JavaScript enabled to view it
 |
