|
Dear Zomi u leh nau a kuamah peuh,
A ( 5 ) veina Zomi Innkuan USA Khawmpi - July 3rd-4th 2010, Columbus ih cihcih ani ong tung ta peetmah ding hita a, ahong zin  ding khempeuhte innteek ZIC ( Zomi Innkuan Columbus ) min tawh khatvei ka hong hopih kik nuam lai uhhi. Lasa ding, bawhlung kimawl ding, tumging tum dingte leh pawipi sung ah panmun nei ding khempeuhte ahi zong, Khawmpi ahong siim ngiat dingte ahi zong, Columbus khuapi ahong hawh sawm ngiatte ahi zong, innteek ahi dingte khempeuh ahi zong ih vek in lawp thei mahmah dingin kong lamen uhhi. Bang hang hiam cih leh USA aom Zomite taangthu ah mun tuamtuam pan mipi tam ki kaihkhopna a masa pen hi ding hi ci'n ka um uhhi.
Ko Columbus aom Zomi u leh naute ka mimal bup un 70 kiim khawng bek ka hi pan uha, ahi zongin ih biak Pasian upna muanna tawh gambup khawmpi zindo dingin a khensat ka hi zaw uhhi cih a masa pen in kong thei sak nuam uhhi. Omna khawlna, neek leh dawn, zin leh leeng do dan, hungeel dan , etc. te ah ki cinlahna tampi om kha dinga, tua te na hong theihsiamna ding uh zong ka hong thum khol nuam uhhi.
ZIUSA Khawmpi zin leh leeng' khempeuh a nungta Pasian biakinn siangtho sungah giahphual kisat sak ding ahih man in Zomi u leh nau a kuamah peuh in kham' theih guihtheih, za muam za teep, PK, etc. a kipan om dan khawl dan te khempeuh a kilawm thei pen in ih ki dop ciatna dingin ih biak Pasian min tawh ka hong thum nuam uhhi. Delhphah, puanza, lukhap, etc. cihte hong ki ging ciat ta un. July 2nd nitak lam a kipan zin tun kipan ta dinga, zin khempeuh hih anuai a biakinn ah tung masa dinga, tua mun pan in biakinn dang ah zin ong kihawm sawn ding hi.
Zomi Christian Church - Columbus
At Holy Trinity Evengelical Lutheran Church
2001 NW Blvd.
Columbus, OH 43212
ZCC Columbus biakinnpi pan Zomi Idol USA, Zolia Zotaang kiteelna, Zomi Concert USA leh Zomi Innkuan USA Cup kibawlna ding munte ahi zong, zin leh leeng khempeuh in nuamtak in kisil theihna dingin Zomi inn te omna address leh phone nambat te ahi zong, zin tunna biakinn ciat ah Dean ( innteek ) ahong sepsak ding te min leh phone nambat te ahi zong ki ngah thei ding hi. Tua hi-in hehpihna tawh zin leh leeng ding khempeuh in Zomi inn ah atung ding te ih hi zong, biakinn ah atung ding te ih hi zong tu a kipan zin phazah ding sazian ZIC makaipite tungah ong zasak khol thei le uh ci'n ut mahmah ungh.
ZIUSA Khawmpi zindo na ding in ZIC in vok luang 2, bawngno 1 leh ak luang 70 ka na kiging uhhi. Voksa, bawngsa, aksa a ne kim thei lo te a dingin neek khat ciangin sa nam nih ta ki huan ding hi.
Zomi itna sung ah,
Thang Cin Pau ( Paupi ), President, ZIC
Cell: 614-625 6233
Thawng Deih Khup ( Khupno ), VP - ZIC
Cell: 614-353 4189
Hau Za Cin ( Hau Cin ), Secretary, ZIC
Cell: 614-735 5185
Pau Sian Mang ( Mangpi), AS, ZIC
Cell: 614-735 2246
Hau Khan Dim ( Dimkhek ), Treasurer, ZIC
Cell: 614-625 6101
 |
