|
Written by Thangboi
Wednesday, 27 January 2010 23:31 |
 |
 |
 |
|
|
Zangkong Khuahun : January 27, 2010
|
 Uitalte Kipetpet ta
Uital eastern command omna ahi Shan State Lashio khua ah tukha 24 ni leh 25 ni in uitalte' lak ah lai pawlkhat kihawm hi."Galkap leh mipi, nuntakna kibang; ki thutuak leng gualzo ding", " Nek leh dawn, silh leh ten haksatna; tumahmah in beisak un", "Kikup khopna (dialogue) thupi sak un", cihpian khawng vive hihtuak hi. Uital sungah zong ki lunglut tek ahih man in amukhalo te bang amukha te'n hilh tanghtangh liang uh ci hi.
Tukha 25 ni mah in Taungngu gam Thantaunggyi khua ah uital sung buaina nasia takin piang cih zong kizak beh hi. Naypyaytaw pan aa paite tawh kikap uh hihtuak hi. Thaupi (rockt longcher) nangawn tawh kikap uh ahih manin Rader nih siacip in uital 10 val bang siding in ki ummawh hi.
General Maung Bo aa kipan general honkhat in thumang nawnlo cih thuzong tulaitak thang mahmah hi. Kiteelna ah alut dingte'n a uniform uh suahkul ding ahih manin tuapen kihta mahmah uh ci'n kigen hi.
ASSK November teh
Tukha 21 ni in uital home minister Maj-Gen Maung Oo in Kyaukpadaung khua ah thu agenna ah ASSK tukum November kha athongkiat hun abei ciangin kikhah ding aa NLD Vice Chairman U Tin Oo zong Febrary kha ciangin kikha ding hi ci'n gen hi.
Pawlkhat in hih uital minister pa' gen ahi takpi ahih leh uital te'n October kha ciangin kiteelna bawlsawm teeiteei uh hiding hi kici tek hi.
Zogam ah Guitar hoih mahmah khat
Pyidawthar khua tuiphum pawlpi ading in JK Kam (Norway) in Bass guitar zang 5 khat leisak hi. A guitar pen Lazy Club music band aa bass tum Cinpi' aa ahi hi. Zogam aa ding acih ciang in atum kimlai, azat kimlai mah piapah lel hi. "Hihte ngahhak mahmah hiveh aw" cilai hi.
Khatvei Chit San Maung in Cinpi' kiang ah "No Zomi te'n abang cia bass guitar bekbek tum navua?" acih leh Cinpi in "Zawnglua kaih ciang vua zang li bek leizo" ci'n ciamnuih dawn ziau hi. Adang khat in "Salai Tawna te' ABC music band pen ABC akhiatna bang ahia leh ?" ci leuleu aa Cinpi in "All beautiful Chins" acihna hi'n teh ci leuleu in nui zaizai uh hi.
 |
