|
Written by Thangboi
Wednesday, 28 July 2010 16:29 |
 |
 |
 |
|
|
Zangkong Khuahun! July 27, 2010
|
Mawhna Nam Sagih : Tulaitak Uital Than Shwe India gam ah lutol biakna tawh kizui in mawhsuutding leh bumh leh ding in apai laitak ih theihsa ciat hi. Zanni in India suahtakna pu ahi Mahatma Gandhi ii han ah pakkual vapia uh hi. Guah uum aa bel aa buah bangin zu ahih manin India galkap te'n galkap ngeina in dawn theilo uh hi. Pakkual piakna aman khit ciangin India in Mahatma Gandhi ii kammal aminthang mahmah ahi "Seven Social Sins" aki at laipi khat letsong in pia uh hi. Tua Seven Social Sins te anuai aa bang hi.
Seven Social Sins
1. Politics without principles
2. Wealth without work
3. Pleasure without conscience
4. Knowledge without character
5. Commerce without morality
6. Science without humanity
7. Worship without sacrifice
Zomi te'n zong hoihtak alungngaih huai leh azuih huai thu vive hi. Hih atung aa Seven Social Sins India in Than Shwe te nupa apiak kiukiau uh pen lungdam huai in apilna uh kilangh hi. A man hong attach ing.
Zomi Missionary Khat: Tukum June kha 15/16 nite in Rakhine State sungah tuiciin tungin mincimh ahih man in mi 69 asih ban ah inn tampi kisia in mi tul tampi in dongtuak hi. Tua lak ah Ponna Kyun Township sung aa Thaye Pin khua zong kihel hi. Thaye Pin khua ah Zomi missionary khat om aa khuabup in inn 15 apha lak ah inn 5 Christian suakkhin hi. Hih thu uital te'n zadah mahmah uh hi. Ponna Kyun TPDC Chairman Saw Tun Aung in "Hihpa ka hawlkhiat kulding hiveh aw" ci in phunphun hi.
Talpakte Honglaang Kik : Tawlkhat sung talpak (meitei) te Zogam pan kihem khia uh himah leh tu'n hong lutkik uh aa uang tektek uh hi. Uital te'n India te phinna in zangh hi. Zavom ciinna leitang Acre 5,000 peuhmah aphata dingin ki tuat hi. Zavom at ciangin aphual ah tawi khat kyats 1.8 million in kikhawng lianlian ahih manin aciing te in lemsa mahmah hi. Zavom kiciinna Tonzang gam ah tulaitak sum tam mahmah ci uh hi. Tonzang khuasung bekbek ah India phone mal 100 val thamtham omta hi. Bear pen a thawl in kilei nawnlo in a box in kilei ta ci uh hi.
Tedim ah Utong teng sial suak : Tedim ah Chin party te ah alut mi 15 pha dekdek ta ci hi. NLD MP Pu Gin Thang in chairman semin NLD member lui tawmkhat mah lut hihtuak hi. Tedim khangno kheltat pawlkhat in "Utong teng sial suakta ei" ci uh hi. Pawlkhat in bel "Kitelna a om sial in lut in aman khit teh nusia zeel ding cihdan hive maw" ci uh hi.
CPP Tonzang Ah : Chin Progressive Party te'n Zangkong aa Tedim kampau sung ah azol zawh sunsun uh ahi Pu Kham Do Nang Tonzang paisak uh hi. Pu Kham Do Nang in "Sung Tin Par in zong lakh 3 hong pia khin; campaign kibawl theih taktak ciangin lasa in hongpaito laiding hi" acih leh Khalkha te'n CPP amuhdah mahmah lam uh atheilo mi pawlkhat in um dektak liang uh hihtuak hi. Papi thuthei deuh pawl in bel "Na CEC member teng uh hong lak in" ci'n dong uh ah No Than Kap' min amuh uh ciang un "Piang kei ei!" ci'n pusuak ngeingai uh hi.
Kimuh Khopna : Tonzang leh Tedim pan in 2010 uital election vai alung himawh deuh pawlkhat Zangkong hongpai suk uh aa Pu Chin Sian Thang tawh kimu uh hi. Tutung Zomi Min tawh dinding lah paammaih lua (dintaklo. Zomi in minhoih neikhin) ahih man in bangcih ding cih hi pipen hi. Electoral law abat leh party khatpeuh adem aom kei leh angahsa in kisim ding cih himawk ahih manin tuavai ngaihsutna tuamtuam kikupnawi khit ciangin lungdam leh lungkim takin inn lam zuanin tungkik khinta uh hi. Tuni Tedim ah kikupna na neilai ding uh hi.
Tonzang Ah Ip Star : Zogam sung aa khuapi khat ahi Tonzang ah internet asawt lo in mipi in zangthei tading hi. US aa om Tonzang mite' hamciamna tawh avan teng tungkhin ta aa August khasung in mipi in zangthei tading hi. Tutadih in UNDP tebek in nei ahih manin mipi in zangkha taktak lo hi. Hih athak pen khualaizang ahi Pu Gin Khaw Thawn te' inn ah kikoih ding ci hi. Zomite ih mit hong keuhkhia taktak tading aa ih bilte hong kihong khia taktak tading ahih manin lungdam huai mahmah hi.
 |
